Bakı İlahiyyat Kollecində müəllimlərin işə qəbulu həyata keçirilir

Azərbaycan İlahiyyat İnstitutunda (Aİİ) Bakı İlahiyyat Kollecinə (BİK) müəllimlərin işə qəbulu ilə əlaqədar sınaq (demo) dərsləri keçirilib.

Dərslər Azərbaycan dili, Ərəb dili, Fiqh üsulu, Əqaid, Qurani-Kərim, İslam hüququ, İslam əxlaqı fənləri üzrə təşkil olunub.

Dini Qurumlarla İş üzrə Dövlət Komitəsinin (DQİDK) tabeliyində fəaliyyət göstərən Azərbaycan İlahiyyat İnstitutu yanında Bakı İlahiyyat Kollecinə yeni kadrların işə qəbulu zamanı ilk mərhələdə təqdim edilən CV-lər nəzərdən keçirilir. Bu mərhələdən uğurla keçənlər sınaq dərslərinə cəlb olunurlar. Sonda komissiya üzvlərinin və müəllimlərin iştirakı ilə işə qəbulla bağlı yekun qərar verilir.

Məlumat üçün bildiririk ki, Bakı İlahiyyat Kollecinə “Dini-mənəvi xidmət” ixtisası üzrə tələbə qəbulu həyata keçirilir. Kollecə qəbul olmaq istəyənlərin DİM tərəfindən yaradılan Dini-Psixoloji Komissiyada (DPK) məqbul qiymət almaları zəruridir.

Müsahibədə abituriyentlərin dünyagörüşləri və dini bilikləri, dini baxışları və dünyəvilik anlayışları, psixoloji parametrlərinin ixtisasa uyğunluğu, tolerantlıq və multikulturalizm təsəvvürləri yoxlanılır.

Müsahibədən uğurla keçən abituriyentlər ixtisas seçimi zamanı tam orta təhsil bazasında orta ixtisas təhsili səviyyəsinə aid digər ixtisaslarla yanaşı, Azərbaycan İlahiyyat İnstitutu yanında Bakı İlahiyyat Kollecinin “Dini-mənəvi xidmət” ixtisasını da seçə bilərlər.