Dini-Psixoloji Komissiya üzrə müsahibə mərhələsi başa çatıb

Azərbaycan İlahiyyat İnstitutunda (Aİİ) III ixtisas qrupu üzrə bakalavr pilləsinin “İslamşünaslıq” ixtisasına qəbul olmaq istəyən abituriyentlər üçün müsahibə mərhələsi başa çatıb. Dini-Psixoloji Komissiya 31 iyul–2 avqust 2025-ci il tarixlərində fəaliyyət göstərib.

Abituriyentlərin dünyagörüşü səviyyələrinin və “İslamşünaslıq” ixtisasına maraqlarının müəyyənləşdirilməsi məqsədilə Dövlət İmtahan Mərkəzi (DİM) tərəfindən Dini-Psixoloji Komissiya yaradılıb. Komissiyanın tərkibinə ilahiyyat sahəsi üzrə mütəxəssislər, həmçinin Dini Qurumlarla İş üzrə Dövlət Komitəsinin, Azərbaycan İlahiyyat İnstitutunun və DİM-in əməkdaşları daxil ediliblər.
Müsahibədə abituriyentin dünyagörüşü və dini bilikləri, dini baxışları, dünyəvilik anlayışı, psixoloji parametrlərinin “İslamşünaslıq” ixtisasına uyğunluğu, tolerantlıq və multikulturalizm təsəvvürləri yoxlanılıb.

DİM-in saytında müsahibə mərhələsində iştirak etmək üçün 143 abituriyent qeydiyyatdan keçib. Onlardan 52 nəfər “məqbul” alıb.

Müsahibədən uğurla keçən abituriyentlər seçim zamanı Azərbaycan İlahiyyat İnstitutunun “İslamşünaslıq” ixtisasını da seçə biləcəklər.

Məlumat üçün bildiririk ki, Azərbaycan İlahiyyat İnstitutu Dini Qurumlarla İş üzrə Dövlət Komitəsinin tabeliyində fəaliyyət göstərir. Aİİ-də bakalavr səviyyəsi üzrə “Dinşünaslıq” və “İslamşünaslıq” ixtisaslarına tələbə qəbulu həyata keçirilir. Ali təhsil müəssisəsində tələbələr ödənişsiz təhsil almaqla yanaşı, həmçinin təhsil aldıqları müddətdə müxtəlif adlı təqaüdlər qazanmaq imkanı əldə edirlər.