Ramazan ayı münasibətilə tədbir təşkil olunub

Azərbaycan İlahiyyat İnstitutunda (Aİİ) Ramazan ayı münasibətilə tədbir təşkil olunub.

Aİİ İlahiyyat fakültəsinin dekan müavini, f.f.d. Kövsər Tağıyev Ramazan ayı münasibətilə hər kəsi təbrik edib. K.Tağıyev tələbələrə orucluğun tarixi və mahiyyətindən bəhs edib.

Aİİ İslamşünaslıq kafedrasının müəllimi, f.f.d. Vüqar Səmədov bu ayın hikmət və fəzilətləri mövzusunda söhbət açıb. V.Səmədov Ramazanın mənəvi yüksəliş və bərəkət ayı olduğunu, oruc ibadətinin insanlara səbri, təqvalı olmağı öyrətdiyini vurğulayıb. Bu müqəddəs ayda insanların lüzumsuz işlərin ardınca getməsinin doğru olmadığını diqqətə çatdırıb.

Ramazanın mənəvi-ictimai əhəmiyyətindən bəhs edən V.Səmədov bu müqəddəs ayın həmrəylik, dostluq, qardaşlıq, sevgi, mərhəmət və ruzi-bərəkət günləri olduğunu vurğulayıb, cəmiyyət üzvləri arasında əlaqələrin gücləndirilməsində Ramazan ayının xüsusi əhəmiyyətə malik olduğunu söyləyib.